Hanuman Chalisa
दोहा :
श्रीगुरु चरन सरोज रज, निज मनु मुकुरु सुधारि।
बरनऊं रघुबर बिमल जसु, जो दायकु फल चारि।।
बुद्धिहीन तनु जानिके, सुमिरौं पवन-कुमार।
बल बुद्धि बिद्या देहु मोहिं, हरहु कलेस बिकार।।
चौपाई
जय हनुमान ज्ञान गुन सागर।
जय कपीस तिहुं लोक उजागर।।
रामदूत अतुलित बल धामा।
अंजनि-पुत्र पवनसुत नामा।।
महाबीर बिक्रम बजरंगी।
कुमति निवार सुमति के संगी।।
कंचन बरन बिराज सुबेसा।
कानन कुंडल कुंचित केसा।।
हाथ बज्र औ ध्वजा बिराजै।
कांधे मूंज जनेऊ साजै।
संकर सुवन केसरीनंदन।
तेज प्रताप महा जग बन्दन।।
विद्यावान गुनी अति चातुर।
राम काज करिबे को आतुर।।
प्रभु चरित्र सुनिबे को रसिया।
राम लखन सीता मन बसिया।।
सूक्ष्म रूप धरि सियहिं दिखावा।
बिकट रूप धरि लंक जरावा।।
भीम रूप धरि असुर संहारे।
रामचंद्र के काज संवारे।।
लाय सजीवन लखन जियाये।
श्रीरघुबीर हरषि उर लाये।।
रघुपति कीन्ही बहुत बड़ाई।
तुम मम प्रिय भरतहि सम भाई।।
सहस बदन तुम्हरो जस गावैं।
अस कहि श्रीपति कंठ लगावैं।।
सनकादिक ब्रह्मादि मुनीसा।
नारद सारद सहित अहीसा।।
जम कुबेर दिगपाल जहां ते।
कबि कोबिद कहि सके कहां ते।।
तुम उपकार सुग्रीवहिं कीन्हा।
राम मिलाय राज पद दीन्हा।।
तुम्हरो मंत्र बिभीषन माना।
लंकेस्वर भए सब जग जाना।।
जुग सहस्र जोजन पर भानू।
लील्यो ताहि मधुर फल जानू।।
प्रभु मुद्रिका मेलि मुख माहीं।
जलधि लांघि गये अचरज नाहीं।।
दुर्गम काज जगत के जेते।
सुगम अनुग्रह तुम्हरे तेते।।
राम दुआरे तुम रखवारे।
होत न आज्ञा बिनु पैसारे।।
सब सुख लहै तुम्हारी सरना।
तुम रक्षक काहू को डर ना।।
आपन तेज सम्हारो आपै।
तीनों लोक हांक तें कांपै।।
भूत पिसाच निकट नहिं आवै।
महाबीर जब नाम सुनावै।।
नासै रोग हरै सब पीरा।
जपत निरंतर हनुमत बीरा।।
संकट तें हनुमान छुड़ावै।
मन क्रम बचन ध्यान जो लावै।।
सब पर राम तपस्वी राजा।
तिन के काज सकल तुम साजा।
और मनोरथ जो कोई लावै।
सोइ अमित जीवन फल पावै।।
चारों जुग परताप तुम्हारा।
है परसिद्ध जगत उजियारा।।
साधु-संत के तुम रखवारे।
असुर निकंदन राम दुलारे।।
अष्ट सिद्धि नौ निधि के दाता।
अस बर दीन जानकी माता।।
राम रसायन तुम्हरे पासा।
सदा रहो रघुपति के दासा।।
तुम्हरे भजन राम को पावै।
जनम-जनम के दुख बिसरावै।।
अन्तकाल रघुबर पुर जाई।
जहां जन्म हरि-भक्त कहाई।।
और देवता चित्त न धरई।
हनुमत सेइ सर्ब सुख करई।।
संकट कटै मिटै सब पीरा।
जो सुमिरै हनुमत बलबीरा।।
जै जै जै हनुमान गोसाईं।
कृपा करहु गुरुदेव की नाईं।।
जो सत बार पाठ कर कोई।
छूटहि बंदि महा सुख होई।।
जो यह पढ़ै हनुमान चालीसा।
होय सिद्धि साखी गौरीसा।।
तुलसीदास सदा हरि चेरा।
कीजै नाथ हृदय मंह डेरा।।
दोहा :
पवन तनय संकट हरन, मंगल मूरति रूप।
राम लखन सीता सहित, हृदय बसहु सुर भूप।।
Doha :
Shri Guru charan saroj raj,
nij manu mukur sudhari.
Baranau Raghuvar bimal jasu,
jo dayaku phal chari.
Buddhiheen tanu jaanike,
sumirau Pavan Kumar.
Bal buddhi vidya dehu mohi,
harahu kalesh vikaar.
Chaupai :
Jai Hanuman gyaan gun saagar.
Jai Kapees tihun lok ujaagar.
Ramdoot atulit bal dhaama.
Anjani putra Pavansut naama.
Mahabir Bikram Bajrangi.
Kumati nivaar sumati ke sangi.
Kanchan baran biraaj subesa.
Kaanan kundal kunchit kesa.
Haath bajra au dhwaja biraajai.
Kaandhe moonj janeu saajai.
Shankar suvan Kesarinandan.
Tej prataap maha jag bandan.
Vidyavaan guni ati chaatur.
Ram kaaj karibe ko aatur.
Prabhu charitra sunibe ko rasiya.
Ram Lakhan Sita man basiya.
Sookshma roop dhari Siyahin dikhaava.
Bikat roop dhari Lanka jaraava.
Bheem roop dhari asur sanhaare.
Ramchandra ke kaaj sanvaare.
Laay Sanjeevan Lakhan jiyaaye.
Shri Raghubeer harashi ur laaye.
Raghupati keenhi bahut badaai.
Tum mam priya Bharat hi sam bhaai.
Sahas badan tumharo jas gaavain.
As kahi Shripati kanth lagaavain.
Sanakaadik Brahmaadi Muneesa.
Narad Saarad sahit Aheesa.
Yam Kuber Digpaal jahaan te.
Kabi kobid kahi sake kahaan te.
Tum upkaar Sugreevahin keenha.
Ram milaay raaj pad deenha.
Tumharo mantra Vibhishan maana.
Lankeshwar bhaye sab jag jaana.
Jug sahasra yojan par Bhaanu.
Leelyo taahi madhur phal jaanu.
Prabhu mudrika meli mukh maahin.
Jaladhi laanghi gaye acharaj naahin.
Durgam kaaj jagat ke jete.
Sugam anugrah tumhare tete.
Ram duaare tum rakhvaare.
Hot na aagya binu paisaare.
Sab sukh lahai tumhari sarna.
Tum rakshak kaahu ko dar naa.
Aapan tej samhaaro aapai.
Teenon lok haank te kaanpai.
Bhoot pisaach nikat nahin aavai.
Mahabir jab naam sunaavai.
Naasai rog harai sab peera.
Japat nirantar Hanumat beera.
Sankat te Hanuman chhudaavai.
Man karam bachan dhyaan jo laavai.
Sab par Ram tapasvi raaja.
Tin ke kaaj sakal tum saaja.
Aur manorath jo koi laavai.
Soi amit jeevan phal paavai.
Chaaron jug prataap tumhaara.
Hai prasiddh jagat ujiyaara.
Sadhu sant ke tum rakhvaare.
Asur nikandan Ram dulaare.
Asht siddhi nau nidhi ke daata.
As bar deen Jaanaki Maata.
Ram rasaayan tumhare paasa.
Sada raho Raghupati ke daasa.
Tumhare bhajan Ram ko paavai.
Janam janam ke dukh bisraavai.
Antakaal Raghubar pur jaai.
Jahaan janm Hari bhakt kahaai.
Aur devta chitt na dharai.
Hanumat sei sarb sukh karai.
Sankat katai mitai sab peera.
Jo sumirai Hanumat balbeera.
Jai Jai Jai Hanuman Gosai.
Kripa karahu Gurudev ki naai.
Jo sat baar paath kar koi.
Chhootahi bandi maha sukh hoi.
Jo yah padhai Hanuman Chalisa.
Hoy siddhi saakhi Gaurisa.
Tulsidas sada Hari chera.
Keejai Naath hriday manh dera.
Doha :
Pavan tanay sankat haran,
mangal moorti roop.
Ram Lakhan Sita sahit,
hriday basahu sur bhoop.